هاذي حلوة
إذا كنت تعاني من "طقطقة" الأصابع و تبي تعرف اذا كانت هالشغلة مضرة او زينة، فتطمن , لأن أحد الأطباء يقول إن هاذي" الطقطقة" مصدرها غازات تتكون بين عظام الأصابع و عندما "تطقطق" فإن هذه الغازات تخرج فتصدر هذا الصوت
و لكن ، يفضل عدم الأدمان على هالشغلة ، و عمل "طقطقة" مرة أو مرتين باليوم ما راح يكون مضر
معلومة مفيدة و زينة :)
علشان محد يحن علي بعد اليوم ، بسك ما بسك ، يبى هذا كلام الأطباء مو من عندي
عمرة رمضان
لأني ما رحت شهر عسل فقررت انا مع المدام ان ناخذ لنا كم يوم عمرة، دام رمضان قرب ، فبنزول أول إعلان توكلت على الله و رحت و حجزت ، و لكن كما في معظم المغامرات يتعلم الواحد منها دروس و عبر ما راح ينساها ، و من هذه الدروس و العبر أنني ما أروح الا لفندق عارفه او سائل عنه ، و لا ابذمتكم هذا فندق ليلته ابخمسين دينار!!و
اذا تلاحضون انه مافيه شي من الزود ، بس ميزته الوحيده انه قريب من الحرم من صوب باب المروة ،تقريبا 40 متر عن الحرم فقط! (عبرة شارع بس) وهذا الشي الوحيد اللي يشفعله
ثاني شغله،، تعلمتها من الرحلة ان الهنود بالذات في جميع مناطق المملكة لازم و لابد من انك اتكلمهم اب نفس خايسةو لا مايمشون عدل ، مو شللي صار ، رحت حق "مكوجي" (مصبغة بالسعودي :) )و
سلمت عليه مارد ! رديت سلمت عليه مرة ثانية رد و مو عاجبه ، و يوم رحت اعطيه الفلوس رد لي الباجي و زين ماحذفهم ابويهي !! ، خو اللللللللذينة ، اشسالفة الهنود بالسعودية مستأسدين ، مادري الأخوة السعوديين معاملتهم لهم خلتهم يتصرفون شذي ؟ و لا السعودية بالذات تجذب هالنوعية من البشر ؟ مادري شللي صاير عندهم !؟!؟
ثالث شغلة ،، التكاسي ، المشكلة انهم يقولونها ابويهك تبي تبي ماتبي ترى في غيرنا . المشكلة صدف ان طيارتنا تهبط ابمطار الحجاج (أو صالة الحجاج) ، و هي منطقة معزولة عن المطار و عن مدينة جدة ككل ، إذا انت تاخذ التكسي من جدة الى مكة اب 150 ريال ، من مطار الحجاج تأكد انك ماراح اتحصل اقل من 300 ريال ، هذا على الأقل ، هذا غير اذا انت ماخذ جمس عود يعني يطلع عليك عادي 500 او 600 ريال !؟،
ماني عارف شللي حاصل ابهالعالم ، وين ما تروح انت مستهدف كخليجي ، حتى ابدولة شقيقة كالسعودية ، اتدش محل خردوات تبي تشتري مقص ، المقص أصلن مايستاهل حتى ريال واحد الأخوة الأكارم من يشوفونك داش عليهم على طول ايقولك 5 ريال (تقريبا 400 -500 فلس) !؟!؟ المشكلة ان صاحب المحل سعودي !؟ احنة انعيب على الاخوة السوريين و الهنود عندنا بالكويت اثاري حتى ربعنا بالسعودية عندهم نفس السلوك ،
ابي افهم ،، يعني خليجي مكتوب على راسه "مغفل" كل من هب ودب يبي ياكل اللي ابجيبه !؟!؟
وعلى فكرة ترى المحل اللي قاعد اتكلم عنه مقابل الحرم مباشرة ، بس هم نصاب !!
الله ياهو زحمة الحرم
شفتو ماشاء الله اشكثر الناس !! ترى هذي الصورة يوم الخميس 28-9-2006 الساعة 12 بالليل !! ، هذا مسعى الدور الأرضي
هذا الجو الإيماني اللي يهون عليك كل المشاكل اللي اتحوشك طول النهار
و كان مسك ختام رحلتنا
دجاج البيك ،، أفضل دجاج مقلي في العالم ،، بس للأسف ما له اي افرع خارج مكة و جدة و لا هو ناوي يفتح ،، و راح أقولكم الأسباب في موضوع ثاني إنشاء الله
Labels: Travel
